［簡明股票分析: 662 陳智思，94億Book，市值就45億］
（要睇圖就上medium了）
Quite simply，今次冇玩嘢，個題就係what you get。陳智思檔嘢，亞洲金融（662 HK）。呢間公司係佢家族生意，陳弼臣陳有慶家族，泰國華僑。陳弼氏就泰國出世，但個仔陳有慶好似係潮洲出世，陳智思就香港出世，但所以仲有個泰文名 Charnwut Sophonpanich。而662係乜？66唔係地鐵，係泰國嘅dial code．2從何來？正係曼谷。冇人話我知，我亂估的，但應該冇錯。
凡此種種，其實舊post有講過，得閒嘅去慢慢追。（http://bit.ly/2FBd5L5）（ http://bit.ly/2lNtNeV）（http://bit.ly/2lObRkB）
極速sum up就係：662係做金融嘅，以前有銀行，亞洲商業銀行，賣咗畀馬拉佬，就係你而家見到嘅大眾銀行（香港）。662剩返乜？主要係保險。有檔同N咁多人（永亨呀永隆呀創興呀）合營嘅香港人壽，之前賣盤，後來撻Q殺訂。另外佢地仲有一般保險，車保勞保之類。加上泰國有間醫院有股份（medical tourism嘛，食住海南雞割包皮又爽又平啲），係咁多。盤谷銀行都係佢地家族嘢，但唔關662事，倒係盤谷銀行其實係662小股東。
關於陳智思本人任你演繹，始終係建制一部份，你要媽嘅實大把嘢媽。但當年傳佢選特首，而家應該難過何志平做特首。而佢在公在私都多次講唔想做銀行唔想做金融，但奈何係祖業。此外我當年做耆英證券分析員都有睇呢隻嘢，耐唔耐搵下佢傾計，有問必答。你會話係佢工作，係，但我閒日在旺角見到佢佢都好主動同我打招呼。你話係做戲，咁佢都做得好全套。講咁多，總之，我信佢唔會出你古惑。就算古惑都唔會畀其他人古惑。
前事講完，正題，昨日出咗業績。唔係有人講我都冇留意，畢竟隻嘢市值又細，成交又少，冇乜分析員睇。而家公司又多，傳媒都未必會去。新聞有報已經幾難得。（http://bit.ly/2FDe25o）
你見到嘅新聞，就應該會係咁。利潤跌46％，派息都減一大截。點解？都話呢間係金融公司，主要係保險。保險公司拎你啲錢係去投資的 ．舊年咁市況，所有投資都食蕉，包括畢菲特嘅巴郡。
所以你話股價會大跌（寫時係半夜），我唔多信。要明白係跌一早跌咗，因為人人都知舊年股市好差，當時所有啲保險證券股就已經插晒，唔使等今日開牌先知：嘩原來舊年投資環境好差噃咁（咁當然，都有蝕得多同少嘅分別）。正如港交所啲業績冇乜好評，因為日日幾多成交大家有眼睇，你成交一差股價即插—甚至係預計成交會變差已經即插啦。
講返份業績，我覺得幾靚仔喎，甚至覺得幾抵買。當然抵買同會升係兩回事，會升同你應該買又係兩回事。本人冇持有，亦冇任何直接間接利益。都係嗰句，贏錢係你叻，輸錢係你自己揀，冇人拎支槍要你買。
先講盤數。都唔使咩專家都睇到，正係因為投資輸錢累到賺少好多啦，舊年4億8，今年2億6。姑且唔好理咩叫非控股股東權益，總之唔關你事。
但其實個業績遠差於此，見唔見有舊8億嘅 "公平價值變動" ？呢舊嘢就係啲跌咗但未賣嘅東西，係咪「一日唔賣一日都唔係蝕」就觀點與角度，但至少呢舊嘢唔影響盈利（否則你仲邊有2億幾純利？）—不過，呢舊嘢正路係會直接在你個Book度消失咗的！即係點？即係股東冇輸錢，但有舊錢唔見咗—咪即係輸錢咯！一般保險公司都會見到有呢啲情況，所以冇乜人會睇個純利。
戲肉嚟啦喎。你見到，個股東權益（我間住咗嗰度），居然係冇跌到，仲要多咗好多喎，搞乜？明明話有8億要扣嘛。我就當你唔使扣都好，你都係賺2億啫，邊度得嚟由80億book value 變做94億？
個答案，真係比較深。你鍾意可以去份業績慢慢lun（http://bit.ly/2Fw6W2F）。簡單答案就係：第一，咪話賣香港人壽賣唔成，殺訂嘛。但殺訂都係執億幾啫。關鍵就係會計處理，入帳方法唔同咗，就忽然變咗啲嘢出嚟。第二，都係會計東西，唔係佢地獨有，剛剛有啲會計政策變更，詳情不多講，悶死你，但你見其他金融公司都有。但其實上次中期業績都見，唔係全新。
總之，我關心嘅只係一樣嘢。間公司就94億book value，市值就只係45億（自己睇股票機）。如果per share呢？公司9.73億股，寫到明。94億除9.73，每個帳面值就係$9.6左右。股價？而家$4.6（順手你可以乘返9.73億股就知市值係45億）。大折讓噃。
當然啦，唔好天真到咁。大折讓嘅嘢往往係有原因。但662係金融股，亦唔係銀行，本book上面主要都係金融資產，股票債券，而絶大多數係每半年計一次價。照計唔會話同真實價值爭好遠。唔同話拎住啲廠房機器唔知乜嘅工業股。
但，你會話，合和呢？係喎，冇耐前先寫過合和。一樣大折讓到極。一樣話埋你知值68蚊但你都要40蚊投降畀佢。（http://bit.ly/2Fv9ONg）
好，兩個睇法。首先，我當你同合和一樣（地仆街），68蚊嘢40蚊畀返佢，咁隻662都要上到去$5.6，升多兩成先。
第二，我始終相信陳智思唔係胡應湘。唔止係我主觀評價，或其他人嘅評價。你睇公司往績都睇到。事實662從來冇出過咩大問題，雷曼爆煲佢當然都重創，輸咗8億咁滯。但都只係受創，唔係傷元氣更加冇生死存亡嘅問題。而10年後book value 已經一個double．
而最重要嘅係，講多無謂，科水最實際。貼多次畀你睇，見唔見公司嘅股數少咗？因乜？回購咯。都買咗0.5%股本，唔算少了
更正嘅係，啲回購好多都係現股價($4.6)樓上做嘅。有啲天真，但你可以憧憬下，５蚊公司都肯回購啦，大有可能而家繼續。
最後，呢期興咩FinTech InsurTech Proptech，公司都有呢啲新聞（http://bit.ly/2FBVrqF）。我唔會抱咩好大期望，但得個知字。最後賣盤畀大陸佬亦唔係出奇。
懶計數，但即使未計賣盤私有化之類，我理解呢，過去咁多年，你買呢隻嘢，應該多數時間都係跑贏恒指嘅。當然，成交係心乜，同埋悶到你抽筋，就係一個問題了．亦當然，過去表現不代表將來，羅素隻雞畀人劏之前都係好幸福的
Search